Me ceremoninë mbyllëse të mbajtur në stadiumin olimpik të Pekinit, janë mbyllur edhe zyrtarisht Lojërat e 24-ta Olimpike Dimërore Pekini 2022.

Kina organizoi LOD Pekini 2022 prej 4-20 shkurt, organizim ky që kaloi nën hijen e pandemisë Covid 19.

Flamuri ynë valoi edhe në ceremoninë mbyllëse.

Për ekipin olimpik të Kosovës ishin Lojërat e dyta Olimpike Dimërore, pas debutimit në PyeongChang 2018 të Koresë së Jugut.

Kosova u përfaqësua me skitarët Albin Tahiri, që garoi në katër disiplina të skijimit alpin (lëshim, kombinim alpin, sllallom i madh dhe sllallom) dhe Kiana Kryeziu (sllallom i madh).

Tahiri rezultaltin më të mirë e kishte në kombinim alpin, ku doli i 15-ti, ndërsa në sllallom të madh ishte i 30-ti, lëshim i 35-ti dhe sllallom i 37-ti.

Kryeziu doli e 49-ta në sllallom të madh.

Kina u bë shteti i parë që organizoi Lojërat Olimpike Verore dhe Dimërore.

Lojërat e ardhshme Olimpike Dimërore mbahen në Milano dhe Cortina të Italisë, në vitin 2026.