Kosova mund të mos ketë detin por ka notarë pasionantë dhe të suksesshëm në shumë gara. Dhe jo rastësisht janë dy notarë që nga Kosova shkojnë në Lojërat Olimpike Rio 2016. Lum Zhavelli dhe Rita Zeqiri në disiplina të ndryshme do të tentojnë të shënojnë sukses të madh në karrierën e tyre dhe për vendin e tyre.

Të dytë kanë lindur në Prishtinë dhe tash e sa kohë merren me not duke e përfaqësuar vendin në gara të ndryshme botërore por edhe duke qenë kampionë të Kosovës.

Rita Zeqiri është 21 vjeçare dhe fytyra e saj ka qenë shpesh një imazh për vendin. Ajo ka marrë pjesë në shumë gara ndërkombëtare dhe është kampione e shumëfishtë e Kosovës. Në Rio ajo do të garojë në disiplinën 100 metra shpinë.

Lum Zhavelli, një 26 vjeçar synon të arrijë suksese në garat më të mëdha botërore të sportit. Ai kishte përfaqësuar vendin në Kampionatin Botëror të Notit në Kazan të Rusisë. Në Rio Lumi do të garojë në disiplinën 50 metra stil i lirë.

“Kurorëzimi i të gjitha sukseseve, synimeve, dhe realizimi i ëndrrave si sportistë. Për Kosovën po hapet një faqe e re në historinë e sportit dhe shpresoj se do të jetë nxitës për gjeneratat tjera për arritjen e rezultateve kulmore në sport”, thotë Lum Zhavelli për pjesëmarrjen ne Rio.

Ndërkaq Rita Zeqiri ndjehet shumë krenare për të këtë të arritur dhe premton se do të japë maksimumin.

“Pjesëmarrja ne Rio është një fitore e madhe për mua personalisht por ne përgjithësi edhe për rrethin, familjen dhe gjithë ata që kanë qene pranë meje për 11 vite karriere sportive. Ne kemi bërë maksimumin në rrethanat ekzistuese dhe kjo na bënë të ndihemi mirë dhe krenarë  për paraqitjen historike të ekipit të Kosovës”, thotë ajo.