+383 38 222 223 / [email protected]

Sekretari i përgjithshëm i KOK-ut, Besim Aliti dhe udhëheqësit e Akademisë Olimpike, u pritën nga drejtuesit e lartë të KO të Kroacisë

Sekretari i përgjithshëm i Komitetit Olimpik të Kosovës, Besim Aliti, i shoqëruar nga udhëheqësit e Akademisë Olimpike, Fitim Arifi dhe Diellza Kelmendi, janë pritur sot në Zagreb nga drejtuesit më të lartë të Komitetit Olimpik të Kroacisë, presidenti Zlatko Matesha, sekretari i përgjithshëm, Sinisa Krajac dhe drejtori i Akademisë Olimpike të Kroacisë, Sasa Ceraj.

Qëllimi i vizitës së sekretarit të përgjithshëm, Aliti, dhe udhëheqësve të Akademisë Olimpike në Zagreb është thellimi i bashkëpunimit mes dy Komiteteve Olimpike, konkretisht në marrjen e përvojave nga Akademia Olimpike e Kroacisë.

Sekretari i përgjithshëm, Aliti, në emër të presidentit Krasniqi, ka falënderuar presidentin Matesha për pritjen dhe bashkëpunimin e frytshëm mes dy Komiteteve Olimpike, bashkëpunim ky që pritet të zyrtarizohet me nënshkrimin e një memorandumi të bashkëpunimit, që do të nënshkruhet pas vizitës që KO i Kroacisë do t’i bëjë Komitetit Olimpik të Kosovës.

Nga ana e tij, presidenti Matesha, shprehu edhe një herë vullnetin dhe gatishmërinë e tij dhe të Komitetit Olimpik të Kroacisë, për të bashkëpunuar ngushtë me KOK-un.

Edhe koordinatorët e Akademisë Olimpike në Kosovë, Arifi e Kelmendi, patën mundësinë e diskutimit dhe bashkëpunimit me drejtorin e Akademisë Olimpike të Kroacisë, Sara Ceraj.